Oasse poesijagirjes «Midtveis / Lulesamisk poesi på norsk», mij la hiebadime bargo vuolen julevsámegielas «Gasskarájen / Julevsáme poesija», mij almoduváj jagen 2021 almmudagás ABC-Company E-Skuvla AS Gárásjågån.
Lågev
Poesijagirjen li 50 biele poesijas. Aktan gåvåj ja skálmmagåvåjn Sissel Horndales. Tæksta le tjáledum avta ájnna gárgadissan: stuorra álggobokstávajn álggon ja tjuokkajn ållu máŋemussaj girjen.
Girjjetjálle Stig Riemmbe Gaelok la riegádam jagen 1961 ja le bajás sjaddam åvdep Divtasvuona suohkanin, dálla Hábmera suohkan, Nurlátten. Suv ruohtsa li rijkarájá goappásj bielijs julevsáme árbbedábálasj guovlon: Divtasvuonas Vuona bielen ja Jåhkåmåhkes Svieriga bielen.
Gaelok la dálátjij tjállám 7 mánájgirje, gålmmå låhkåmgirje vuodoskåvllåj ja 11 poesijagirje. Suv vuostasj girjje «O, Oarjjevuodna», dåssju julevsámegiellaj, almoduváj 1983 ja lij histåvrå vuostasj poesijagirjje julevsámegiellaj ja vuostasj julevsáme tjáppagirjálasj girjje 46 jahkáj maŋŋela suv láve Birága Ándá girjje «Jåhttee saamee viessom», almodum jagen 1937. Gaelok oattjoj Nuorttarijkaj sámeráde girjálasjvuoda ánssidusáv jagen 2000 mánájgirjes “Biehtár ja Duommá jávren stulliba”.
Uddni Gaelok årru suollun Bohol Filippijnajn, gånnå sån la viessum jage 2014 rájes, aktan ietjas familjajn. Sån sárnnu varrudagájt oasseválldijda girjálasjvuodafestiválan sávadusájn buorre tjállemjagev gájkajda.
*****
juohkka ulmusj bierri ietjas åvdås vásstedit
ja ietjas goade uvsa ålgusbielev rádjat
vaj la máhttelis goahtáj tjágŋat
jus hæhkkat guosse ihtá dan ruopptuj
ij la máj guosse åvdåsvásstádus rádjat
ja sajev dahkat iehtjáda goade sinna
davva de ruoptoulmutja iehtja bierriji dahkat
jus sihti ulmutja galggi sijá lunna guorrit
iv diede jus ulmusjmiella slájvvum la
valla muhttijn degu vuojnnet la låssåt
muhtemijda dádjadit gåktu galggá årrot
*****
Aktalågevnan
valla ij la galla de muv ulmme
ja ij la ga sávadus makkirik bælláj
nágina nali guoddet boastovuodajt
jali dágástallat vil uddnik
gåktu vidjura máhtti jali lulu årrot
dassta de lav agev ballam
ja iv sidá iehtjádij gådij sinna snuoggat
ja åvddånbuktet måjvijt ma e munji gullu
navti de lav mån mihá ja goarssá
ja javllusa majt sihtusa
valla oabme duorgaj nali ij lijssi viellidit
jus ij galmmet sidá suollneijájt
*****
Guoktalågevnan
hásstalus la ietjájduhttet ietjat
bessat oabme ájádallamvuogijs ierijt
vuojná álu låssåt la guodet davva mij la oahpes
ja álgadit ådå vuogijt duola degu ájádallat
ienemus oassáj ulmusj gahttjá ietjas gådtjårájgij sisi
gå starjjá muohttaga sinna dálvveguovddela
gå niedas hæhttu rubmahav guorrit
valla gatjálvis la gåktu tjoavddet
dav tjadnusav mij agev sihtá hárret
ja dábálasj vuogijda máhtsadahttet
juska má ulmusj sihtá åvddålijda rahtjat
*****
Gålmmålågevnan
vuorbedisvuodaj lågo gulluji jáhkkarádasijda
ij la aktak dálátjij duodastam majdik
dat vádnajáhkos mij subtsas alvos ságajt
ja sihtá ulmutjijt balátjit svájggasijs
ja divna ietjá imálasj ihkkunijs
majt ulmusj iesj sjivnnjet jiermij sinna
ja massta lik ballá gå ij duosta
dålusj vuogev luojttet daj ávdas duoddarijda
gåsi dakkár iehpeåssko gullu
ælla máj svájggasa ja gadniha goassak ulmutjijt gåddåm
ja ij la máj rávgga náginav buvvám
juska ulmutja hekkadagi balli dájs ihkkunijs
*****
Nielljalågevnan
suohtas la galla gullat subttsasijt ja giehtojt
luonndosjivnnjádusáj birra duonna dánna
ja gåktu ulmutja li dajt iejvvim sjievnnjis ijájt
ja gåktu li viegadam nábo duogijt
åvddåla vas bessin goahtáj dålå guorraj tjágŋat
ja danna biktalit galmma tjuvdijt
maj li ihkap juojddáv válldám iehtjádijs
mij ij guilu dán galmmatjuvddeæjgádij
valla jus galga riekta ga bivvat
de viertti fáhtsajt ja guobájt nuollat
åvddåla álgá biktalit dållågátten
Girjjetjálle Stig Riemmbe Gaelok.
Gåvvå: Raqiel Geolagon Gaelok, 2024.
Kommentarer
Legg inn en kommentar